डॉ. योगेश क्षीरसागर यांनी बीड अध्यक्षपदाला राम-राम – फेसबुकवर संदेश..!
स्थानिक पातळीवर सतत डावललं…
बीड प्रतिनिधी – राष्ट्रवादी काँग्रेस पार्टी (अजित पवार गट) बीड जिल्ह्यात मोठा धक्का बसला असून बीड विधानसभा अध्यक्षपदावरून डॉ. योगेश क्षीरसागर यांनी धडाक्यात राजीनामा जाहीर केला आहे. स्थानिक स्तरावर निर्णयप्रक्रियेत स्वतःला जाणीवपूर्वक डावलले जात असल्याचा आरोप करत त्यांनी अधिकृत फेसबुक पोस्टमधून आपली भूमिका स्पष्ट केली.
डॉ. क्षीरसागर यांनी फेसबुकवरून भावनिक भाषेत लिहिले की, मी राष्ट्रवादी (अजित पवार गट) बीड विधानसभा अध्यक्षपदी काम करत होतो. परंतु वेळोवेळी स्थानिक पातळीवर पक्षाच्या निर्णय प्रक्रियेत मला डावलले जात आहे. ही बाब मी अनेक वेळा वरिष्ठ नेत्यांना सांगितली, परंतु परिस्थितीत कोणताही बदल झाला नाही. त्यामुळे मी अध्यक्षपदाचा राजीनामा देत आहे.”
यासोबतच त्यांनी पक्षाने दिलेल्या संधीबद्दल आभार व्यक्त करत म्हटले आहे की “पक्षाने माझ्यावर टाकलेल्या जबाबदारीतून मी प्रामाणिकपणे, निष्ठेने पक्षाची विचारधारा तळागाळातील कार्यकर्त्यांपर्यंत पोहोचवली. विश्वास टाकल्याबद्दल वरिष्ठ नेतेमंडळींचे मी मन:पूर्वक आभार मानतो.
डॉ. क्षीरसागर यांनी केलेल्या या अचानक घोषणेमुळे बीडमधील राष्ट्रवादी (अजित गट) मध्ये मोठी खळबळ उडाली आहे. विधानसभा स्तरावर पक्ष संघटनात सुरू असलेल्या नाराजीचे हे आणखी एक गंभीर उदाहरण असल्याच्या चर्चा राजकीय वर्तुळात रंगू लागल्या आहेत.
या घडामोडीमुळे आगामी निवडणुका व बीडमधील राजकीय समीकरणांवर कोणता परिणाम होणार याकडे आता सर्वांचे लक्ष लागले आहे.